ايدينى like ;)))

وانا قاعده بفكر كده مع نفسى .. وبعدد التطورات الكتير اللى بقت فى حياتنا ..نط فى دماغى " تطور " ..مع انه تطور مش مهم اوى يعنى ومش حوار نتكلم فيه ..بس اهو نط ...انا قولت طالما نط..اقولكم عليه ..التطور ده اسمه " like" ... حاجة كده بتدوس عليها لما حاجة تعجبك ...لدرجه ان اى حد دلوقتى وهو خارج وعجبه حاجة يقولك لا بجد " like" او قولت جمله عجبت واحد صاحبك يقوم رادد عليك ويقولك " like" وكأن خلاص بقت كلمه

جديده انضمت لقاموسنا اللغوى للتعبير عن اعجابنا بالحاجه ..وعلى اللى قدامك فهم الحوار كله من اوله لاخره وعلى رأى المثل " facebookers will relate " .... بس اللى بستغربله اكتر الحاجات اللى بتبقى معمولها share من اصحابى على home عندى ولازم التعليق المستفز اللى تحت الصوره او الكلام زى مثلا:

حرام عليك لو معملتش لايك للصورة دى

تبقى مش انسان لو معملتش لايك للصورة دى

اكيد الشيطان منعك تعمل لايك للصوره دى

او مثلا بقى يجيبهالك على هيئه سؤال : ها كام لايك للامورة الحلوة دى ؟

ها كام لايك للاعب الجامد ده ؟

كأن مثلا بيحوشله تبرعات فى دفتر توفير

او مثلا يجيبهالك بالشفقه بقى ... صورة نانسى عجرم جابت 1240010005 لايك ..ياترى الصورة دى بقى هتوصلها معانا لكام لايك ؟

اكييد كلكو بتشوفو الكلام ده ..نفسى اعرف ردود افعالكم بتبقى ايه ؟

بس تعرفوا بما ان اللايك بقت نظريه بنتباحث فيها ..فلازم نذكر الجانب الاخر منها ..وهى ايه ياترى سحر مفعووووووول اللايك اللى بتعلمه الكلمه دى فى الناس عشان توصل بيهم الدرجة انهم يطلبوها بنفسهم ..هاا ؟؟ يعنى انشكاح مثلا ؟ ولا تشجيع؟ ولا احساس انى مش لوحدى فى العالم ؟..اكيد مانكرش ان ليها مفعول بردو ...

فى فيديو اتعرض من فترة مشارك فيه ناس مشاهير كتير برعايه كوكاكولا ..زى هند صبرى ود. ابراهيم الفقى الله يرحمه ..وغيرهم ..بيتكلمو عن اهميه اللايك دى ..انا فى الاول استغربت الحوار يعنى .بعدين قعدت افكر فى الميزه الوحيده للموضوع ده ..

ان بيحسسك ان صوتك بيوصل ..وغيرك سمعه وشاورلك وقالك " فل عليك " ..ههههههههههه

واضح ان الموضوع له تاثير وانا معرفش ...بس الاكيد انه مش لازم يبقى يوصلك للاستفزاز ..ومش على مليات على بطال كده ... ده كأن واحد عمال يقول لكل اللى يقابله....والله انت حبيبى ..او عند البنات يا روحى ..يا قمررررر..حبيبتشىىىىىى ...ايه ..شويه اتزان شويه يا جدعااااااااان ... زى الممثلين والمذيعين اللى بيحبوا كل المشاهدين كده بالظبط :)))))))))))))))))))

ملحوظه: هذا الpost لا يهدف للربح نهائى ..قصدى تجميع likes ؛)

ضيف على الباب

ضيف على الباب

كل سنه وانتم طيبين..شهر رمضان على الابواب ..وخلاص هنستقبل الضيف الكريم ده..بس الاول ياترى جهزت

نفسك لاستقبال الضيف ده؟..فكرت هتعمل ايه وهتكرم الضيف ده ازاى؟ ..ولا ما جاش فى بالك اصلا هتعمل معاه ايه

 وايه اصلا هدفك فى الشهر الكريم ده..بس صحيح هنفكر ازاى واحنا كل يوم ملهيين غافلين مش عارفين حتى احنا

فى شهر ايه؟!!ده احنا بنعرف ان رمضان قرب لما نشوف اعلانات المسلسلات فى التليفزيون.يقولك ((قريبا فى

رمضان))..تسأل نفسك : ايه ده؟ هو رمضان قرب ولا ايه!! ..يبقى كويس لو سألت حد وقالك اه احنا فى شهر شعبان

 دلوقتى ورمضان فاضله كام يوم..وكل سنه وانت طيب ...وانت بالصحة والسلامه يا خويا ...نورت المحكمة ..

هاا..طيب دلوقتى عرفنا ان شهر رمضان قرب..تفتكروا هنعمل ايه؟

واحد من الناس يرجع تانى للتليفزيون بعد ما عرف منه ان رمضان قرب..ويقول لنفسه بقى الواحد يعرف اللى جاى

 فى رمضان..عشان يبقى عارف بقى هيتابع ايه وهيسيب ايه!!..لازم التخطيط بردو !!

وواحده تانيه كانت قاعده جنب نفس الواحد اللى عرف بالصدفة ان رمضان قرب..وعرفت الحمدلله هى كمان ( بركة

يا جامع) ..وقامت من مكانها وقالت :طيب ألحق بقى انزل اشترى لوازم رمضان ..ايشى سمنه ورز ومكرونه

 غيرالفراخ والديك الرومى اللى بيبقى فى نص الترابيزه ده..عارفينه؟!!..وطبعا غير الياميش

بقى والذى منه..ومعرفش الاكل ده كله بيروح فين؟!..ولا فى دماغنا ان اصلا من فوائد الصيام اننا بنقلل الاكل وبنظم

المعده ..يعنى مبنكبسهاش..ده حتى عشان نعرف نصلى..وكمان مش لازم كل الاكل ده..امال هنحس بالمحتاجين

ازاى؟!استنى استنى.. سامعة واحده كسلانه بتقول لنفسها..يااه رمضان قرب طب كويس..اهو الواحد بقى يقضيها نوم طول النهار ويصحى بقى على

المغرب أهو بردو والواحد ميبقاش عمل اى ذنوب!! لا فالحة بجد ..لا واعيه اوى!!

نقضيها نوم بقى ..اهو ننام بالنهار ونصحى ناكل ونصحى نتفرج على التليفزيون ..وأهو بالشكل ده اليوم يتقضى

وعلى كده كل يوم ولمده شهر..

يا سلااام بجد ونعم الخطط ونعم تنظيم الوقت ..لا بجد يعنى احنا كده وجبنا اوى مع الضيف اللى جايلنا ده..نوم واكل

 ومسلسلات ..هنقطع نفسنا يعنى!!  وبكده يبقى اجى على العيد واقولك برافو عليك عيدك فرحته راحت منك

 وذنوبك زادت والشيطان فرح فيك زياده والضيف مش زعلان من عندك وياعالم يا مسكين هيجيلك السنه الجايه ولا لأ!!!

هااا!!! تفتكروا ان فيه حد يجب يتقالوا كده؟ أكيد طبعا مفيش حد يحب يتقاله كده ولا بيبقى قصده كده...بس الفكره اننا

بس بنبقى ناسيين وغافلين ..ناسيين انه شهر بيجى مره فى السنه وبيمشى واحنا مش عارفين هايجى تانى ولا لأ..

احنا طول السنه بنبقى ملهيين او متأرجحين ع أدق تعبير..مابين عباده وما بين لهو .. اكيد الحياه مش هتستمر على

وتر واحد.. ولكن ده شهر واحد..وبإيدك تمشيه على وتر منهم يا إما لهو..يإما عباده,وما بالك بالعباده فى رمضان

..متفكرش كتير ..ربنا وضحلنا ثواب العباده فى رمضان وحمسنا ليها..كفايه حديث النبى صلى الله عليه وسلم :

 " من صام رمضان ايمانا واحتسابا غفر له ما تقدم من ذنبه ومن قام رمضان ايمانا واحتسابا غفر له ما تقدم من ذنبه ومن يقم ليلة القدر ايمانا واحتسابا غفر له ما تقدم من ذنبه"

 يعنى ذنوبنا كلها هتتغفر..ايه بقى تانى عايزه؟ ..أصل خد بالك من حاجة.. شهر رمضان ده نيه..

انت بقى ايه نيتك... وايه هدفك فى رمضان؟؟؟ ..أصل أكيد احنا كلنا محتاجين  الهدايا الرمضانيه دى..ده ربنا من

كرمه بعتلنا الشهر ده عشان يغسل ذنوب السنه كلها..ومتنساش ان شهر رمضان اوله رحمه واوسطه مغفره واخره

عتق من النار..غير طبعا الهديه الكبيرة اللى لو عبدنا ربنا صح طول الشهر ان شاء الله تاخدها ..وهى (( ثواب ليلة

القدر )) وطبعا كلنا عارفين قدر الليلة دى وفضلها.

دلوقتى انت عرفت هدايا الضيف وعرفتوا محمل بإيه ..ورينا بقى كرم ضيافتك انت..هتعمل ايه علشان تاخد الهدايا دى

واعلم ان اذا جاء رمضان فتحت ابواب الجنه واغلقت ابواب النار ونادى مناد: "يا باغى الخير اقبل ويا باغى الشر

اقصر"

شوف انت عايز ايه وايه نيتك وهدفك واستعداداتك

اتمنى يكون المعنى وصل ...واوصى نفسى معاكم بحسن العباده فى رمضان ..وبسمو نوايانا واهدافنا ...وادعو الله ان

 يبلغنا رمضان ويعينا ع الطاعة فيه..وألا يمضى هذا الشهر الكريم الا وقد غفرت ذنوبنا وعتقنا من النار ..اللهم آمين

أنا طلعت عايشه

قررت اكتب اى حاجة تيجى فى بالى ..قررت مخليش جوايا حاجات شايفة انها تنفع تتقرى واكسل اكتبها ..

ده انا حتى قررت ان مش بس لما تيجى فكرة ابقى اكتبها ..لا ده انا قررت انها تبقى حالا وفورا ..لان يوم ما بكسل واقرر اكتبها بعد كده .بلاقيها اتبخرت او يعنى الفكرة العامة بس اللى ف مخى ..لكن التفاصيل والتحابيش اللى كانت فى مخى ساحت...وراحت مطرح ما راحت

فبناء على كل ده ..قررت افضى اى حاجة تيجى فى بالى ف ورقة او – تأقلاما مع الواقع – فى word file .... وطبعا ده ايمانا بان خواطرى ثروة قوميه وموهبه محدش يعرف قيمتها غيرى J J J

اكيد بهزر ...انا متواضعة جداا J....احمممم ...لا بجد كل الحكايه انى بس مؤمنه ان كل واحد واى واحد عنده خواطر بتيجى فى باله ..وكلمه خواطر هى جمع لكلمه خاطر ..يعنى حاجة عدت على راسك كده وانت قاعد سرحان او مركز ...يعنى مش لازم تبقى خواطر بالنحوى والفصحى وتبقى بتتكلم فى حاجات مجعلصة ومحتاجة قواميس عشان نفهمها
لكن هى افكار راودتنا ..حبينا نتكلم فيها ..وكلمه على كلمه وفكرة على فكرة ..كونوا موضوع

يمكن مش اهم موضوع فى الدنيا ..بس اللى واثقة منه ..انه مهم للشخص الى كتبه ..مهم لانه عبر عن اللى بيدور جواه ..قدر ينقله ..وقدر يوصله ويشارك بيه غيره
مش فِضل جواه وخلاااااص..
خلال ما انا بكتب الحاجة وبطلعها على الورق –زى ما انا بعمل دلوقتى- ده بيدينى طاقة رهيبه وبحس بحاجة واحده " انا انسانه وليا مخ وبعرف اكتب واعبر " ..ايه ده تصدق انا طلعت عايشة J

عارفين مرة فى مرة ..هتلاقى الخواطر اللى فى بالك دى ..بترتقى لافكار انت نفسك متعرفش انك كنت بتفكر فيها ..وتلاقى تعبيرات انت عمرك ما كنت تتخيل انك ممكن تكتبها حلوة اوى كده

واكيد اللى بيكتب ويعبر ..مرة فى مرة هيلاقى اللى بيكتبه ده بيوصلل للناس كلها وتبقى اهميه اللى بيكتبه اتنقلت من مجرد اهميه شخصيه للتعبير عن الذات النفسيه للبنى ادم ده إلى اهميه بالنسبه لناس تانيه حساها وبتشاركك فى رايك ده

بغض النظر عن الجمله المعقده دى "اهميه  شخصيه للتعبير عن الذات النفسيه " بس من الواضح انى بدات ارتقى اهو وانا مش واخده بالى J هههههههههههه

نرجع لقرارى ..الى هو اييه ؟!! ااااه افتكرت انى اكتب واعبر عن اللى بيدور جوايا..واى فكرة مستهونش بيها واقول دى يادوب مش هتكمل جمله واحده اصلا  ..لا فكرة ورا فكرة هتجيب رغى كتيييييييير ..واكيد هيبقى فيه حاجة مهمه

تصدقوا الموضوع ده ممكن يبقى مفيد والله ..عارفين ازاى

لما تتحول من انك تعمل متعه لنفسك ..الى انك تمتع غيرك ..وفى الحالة دى ..هتلاقى نفسك محتاج تتثقف وتقرا انت كتير عشان تكتب حاجات بينك وبين الناس تكون مشتركة ..وكده الواحد يفيد غيره

ايه ده يا جماااااااعه ...ماشاء الله الوحى عامل احلى شغل معايا النهارده J ههههههههه

يلا إلى ان نلتقى فى كلام تانى ..(واتمنى يبقى مفيد المرة الجايه) اسيبكم تمخمخوا ومتسيبوش اى فكرة جواكو J